Sonerezh breizh da zañsal

Kerdin ha mouezhioù a gan hag a ziskan istorioù an amzer a-vremañ. Setu Eben !

Marine, Sterenn, Enora, teir ganerez kan-ha-diskan, stummet gant Louise Ebrel, a azas kanaouennoù hengounel pe a skriv reoù nevez da lakaat da glevet sav-poentoù a-vremañ, ambrouget  gant tri soner a skiant. Ar c'hwec'h anezho o deus graet anaoudegezh da geñver ar grouidigezh New Leurenn (Leurenn Nevez) gant Emvod Meur ar Gelted e 2018.

Pladenn gentañ : Er maez d'an 23 a viz Du !

Embann ofisiel pladenn gentañ EBEN an 23 a viz Du e-pad ar festival YAOUANK e Roazhon. Ar bladenn a vo er stalioù adalek an 15 a viz Du. Gall a rit prenañ ar bladenn en linen ivez amañ.

Marine LAVIGNE: Kan hag aozerez

Sterenn LE GUILLOU: Kan

Enora JEGOU: Kan

Jonathan DOUR: Violoñs alto ha gaolviolin

Julien STEVENIN: Gourrebed
Antoine LAHAY: Gitar daouzek kordenn ha gitar tredan

Thomas MOISSON:

Alioù arzel, management,  den dave Emvod Meur ar Gelted

Enrollañ ha sonaozañ: Antonin VOLSON

Graferezh: TNV design

Eben a zeu eus a bell-vro, degas a ra ur sell nevez war hor sevenadur hag hon endro. He sell a zo hor melezour, e-tal dezhañ en em rentomp kont eus hor perzhioù heverk ha boutin, eus hor disheñvelder hag hon heñvelder. Ganti e tizoloomp hor ribinoù deomp-ni hag an hentoù treuz a dapomp holl. Eben a sav goulennoù ouzh hon identelezh, pinvidikaat a ra anezhi, reiñ a ra un tamm Diouti hag a zeu da vezañ ur perzh Diouzhomp.

 

Eben a zo stumm benel Egile. An "eil jener", an hini a glever hec'h istor kontet gant mouezhioù paotred, evel Keben ha Dahud, maouezed galloudus bet lakaet da berc'hourezed pe sorserezed. Er bladenn-se hon eus bet c'hoant reiñ da glevet ar Re All : ar maouezed, an divroidi, ar minorelezhioù, ar pobloù kentañ hag an Douar zoken, ar boudoù mut-mañ a glever ral a wech, en ur yezh a glever ken nebeut all. 

EBEN - ISTOR

3de krouidigezh "New Leurenn" er FIL

Emvod Meur ar Gelted en deus ijinet ur serienn nevez a grouidigezhioù e 2016 : « New Leurenn » (Leurenn Nevez). Ur baeronelezh etre arzourien yaouank a Vreizh hag ur soner anavezet e bed ar sonerezh hengounel eo. Krouet eo bet evit ma vefe posupl d'ar rummad arzourien nevez kaout un doare all da zeskiñ ha da vont war-raok er bed-se.  

Evit an trede krouidigezh e 2018 e oa bet fiziet ar renereh arzel d'ar soner violoñs Jonathan DOUR (Denez, Dour/Le Pottier Quartet, Nolwenn Korbell, Liamm, Aodan, Karma...) a ambroug an trio kanerezed yaouank An Teir (Sterenn LE GUILLOU, Enora JEGOU ha Marine LAVIGNE). 

An teir flac'h yaouank o deus graet anaoudegezh 10 vloaz 'zo e-kerz ur stal kan-ha-diskan kaset gant Louise Ebrel ha Fanny Chauffin e Skolaj Diwan Kemper. N'o deus ket paouezet da ganañ asambles abaoe ! 

N'eus ket keit 'zo he deus kroget Marine LAVIGNE da skrivañ he zestennoù war sujedoù a-vremañ, pe da adskrivañ testennoù hengounel evit lakaat anezho da zougen talvoudoù nevesoc'h. Etre traoù all he deus skrivet kanaouenn ar Redadeg 2018 « Betek an Trec'h ». 

A-benn klotaat ar strollad e oa bet pedet daou soner brudet mat gant Jonathan DOUR: Antoine LAHAY ouzh ar gitar daouzek kordenn hag ouzh ar gitar tredan (Nirmaan, Denez, Karma, Dièse 3...) ha Julien STEVENIN ouzh ar gourrebed (Startijenn, Ronan Le Bars, Istan Trio...) Ar 6 soner o deus krouet asambles, diwar o levezonioù dezho, ur rol dibar a sonerezh da zañsal. 

Jonathan a zo ivez stourmer evit ar brezhoneg, ha gant plijadur e labour a-benn lakaat war-wel an teir ganerez a ra gant ar yezh war al leurenn hag en o buhez pemdez. 

2019 : Ar grouidigezh a zeu da vezañ ur strollad ! 

Da heul berzh an abadenn gentañ d'an 10 a viz Eost 2018 e oa bet divizet gant ar sonerien hag  Emvod Meur ar Gelted kenderc'hel gant ar strollad. Setu ganet EBEN !

CONTACT

Jonathan DOUR

jonathandour@gmail.com

06 86 16 55 36

Festival Interceltique

Thomas MOISSON

06 72 49 78 65

thomasmoisson@interceltique-lorient.com 

 
 
This site was designed with the
.com
website builder. Create your website today.
Start Now